ОЮУТНЫ САНААЧЛАГАТАЙ ТӨСЛИЙН СОНГОН ШАЛГАРУУЛАЛТ, ХЭРЭГЖҮҮЛЭЛТ САНХҮҮЖИЛТТЭЙ ХОЛБООТОЙ ЖУРМЫН ТӨСЛИЙН ХЭЛЭЛЦҮҮЛЭГТ ӨРГӨНӨӨР ОРОЛЦОНО УУ Дээд боловсролын шинэчлэлийн төслийн хүрээнд их дээд сургуулийн оюутнуудын санаачилгатай төслийг сонгон шалгаруулах, санхүүжилт олгохтой холбоотой журмын төслийн хэлэлцүүлэгийг 2016 оны 02 сарын 19 ны өдөр 11 цагт Боловсрол, соёл, шинжлэх ухааны яамны 401 тоотод боллоо. Хэлэлцүүлэгт 8 их дээд сургуулийн оюутан, багш нарын 22 төлөөлөл оролцлоо. Уг хэлэлцүүлэг 2015 оны 02 сарын 24-ны өдрийн 12 цаг хүртэл цахим сүлжээгээр үргэлжлүүлж байгаа тул та бүхэн саналаа research@herp.mn имэйл хаяг руу ирүүлнэ үү. Саналаа ирүүлэхдээ дараах зүйлийг анхаарна уу: Журмын тодорхой заалтыг дурдаж, тухайн заалтанд оруулах саналаа тайлбар үндэслэлтэй бичих Өөрсдийн нэр, сургууль болон холбогдох хаягаа заавал бичсэн байх ДЭЭД БОЛОВСРОЛЫН ШИНЭЧЛЭЛИЙН ТӨСӨЛ ОЮУТНЫ САНААЧИЛГЫН ТӨСӨЛ СОНГОН ШАЛГАРУУЛАХ, САНХҮҮЖҮҮЛЭХ ЖУРМЫН ТӨСӨЛ Нэг. Нийтлэг үндэслэл 1.1. Энэхүү журмын зорилго нь Азийн хөгжлийн банкны зээлийн хөрөнгөөр санхүүжиж буй Дээд боловсролын шинэчлэл төслийн хүрээнд дээд боловсролын сургалтын байгууллагын оюутны багаас санаачилсан бүтээлч санал, санаачилгын төслийг /цаашид төсөл гэх/ сонгон шалгаруулах, санхүүжүүлэх үйл ажиллагаатай холбоотой харилцааг зохицуулахад оршино. 1.2. Төсөл боловсруулах, сонгон шалгаруулах, санхүүжүүлэх, хэрэгжүүлэхэд дор дурдсан үндсэн зарчмыг баримтална: 1.2.1. үр ашигтай байх; 1.2.2. өрсөлдөх тэгш боломжтой байх; 1.2.3. ил тод, нээлттэй байх; 1.2.4. хүйсийн тэнцвэрт байдлыг хангасан байх. 1.3. Энэ журамд хэрэглэсэн нэр томъёог дор дурдсан утгаар ойлгоно: 1.3.1. оюутны суралцах орчныг сайжруулах төсөл гэж суралцаж буй тухайн сургуулийн анги танхим, лаборатори, номын сан гэх мэт сургалтын орчинд дутмаг байгаа дэд бүтцийн асуудлыг хямд, оновчтой шийдлээр шийдвэрлэх, нэвтрүүлэх төслийг;
1.3.2. оюутны клубын үйл ажиллагааг идэвхжүүлэх төсөл гэж тухайн сургуулийн оюутны санаачилга, хүсэл эрмэлзэл, сонирхлоор нийлж бий болсон клубын үйл ажиллагааг тогтмолжуулах, туршлагаа бусдад түгээн дэлгэрүүлэх төслийг; 1.3.3. дотуур байрны орчныг сайжруулах төсөл гэж оюутны дотуур байрны тохижилт үйлчилгээ, ая тухтай байдлыг хангах, эрүүл, аюулгүй амьдрах нөхцөлийг бүрдүүлэхэд шаардлагатай шинэ санаа, шийдлийг боловсруулж шийдвэрлэх, нэвтрүүлэх төслийг; 1.3.4. оюутанд үзүүлэх үйлчилгээг сайжруулах, боловсронгуй болгох төсөл гэж сургуулийн зүгээс оюутанд үзүүлж байгаа үйлчилгээг боловсронгуй, шуурхай болгох, шинэ төрлийн үйлчилгээ бий болгох, үйлчилгээнд мэдээлэл технологийн орчин үеийн шинэ технологи нэвтрүүлэх зэрэг төслийг; 1.3.5. дотоодын оюутан солилцоо төсөл гэж тухайн сургуулийн төвийн болон хөдөө орон нутгийн салбарын оюутан солилцооны хөтөлбөр хэрэгжүүлэх; 1.3.6. хөдөлмөр эрхлэлтийг дэмжих төсөл гэж оюутны хөдөлмөр эрхлэх сонирхлыг дэмжих, зуучлахад чиглэсэн төслийг; 1.3.7. хөгжлийн бэрхшээлтэй оюутанд үзүүлэх үйлчилгээг сайжруулах төсөл гэж сургуулийн зүгээс хөгжлийн бэрхшээлтэй оюутанд үзүүлж байгаа үйлчилгээг нэвтрүүлэх, цоо шинэ үйлчилгээ сайжруулах шийдэл, түүнийг түгээн дэлгэрүүлэхэд чиглэсэн төслийг. 1.4. Дараах чиглэлээр суралцаж буй оюутны баг төсөл дэвшүүлнэ: 1.4.1. байгалийн ухаан 1.4.2. инженер технологи, техникийн ухаан 1.4.3. хөдөө аж ахуй 1.5. Төсөл сонгон шалгаруулах үйл ажиллагаа нь 2 үе шаттай байна: 1.5.1. 1-р шат: Сургуулиас томилогдсон шүүгчдийн баг хэлэлцэн сонгон шалгаруулах. 1.5.2. 2-р шат: Нэгдүгээр шатнаас шалгарсан төслийг боловсролын асуудал эрхэлсэн төрийн захиргааны төв байгууллагаас томилсон олон талын төлөөлөл бүхий хорооны хурлаар хэлэлцэн, сонгон шалгаруулах. 1.6. Дор дурдсан чиглэлээр төсөл дэвшүүлсэн багийг сонгон шалгаруулж, санхүүжилт олгоно: 1.6.1. оюутны суралцах орчныг сайжруулах; 1.6.2. оюутны клубын үйл ажиллагааг идэвхжүүлэх; 1.6.3. дотуур байрны орчныг сайжруулах; 1.6.4. оюутанд үзүүлэх үйлчилгээг сайжруулах, боловсронгуй болгох; 1.6.5. дотоодын оюутан солилцоог дэмжих; 1.6.6. хөдөлмөр эрхлэлтийг дэмжих; 1.6.7. хөгжлийн бэрхшээлтэй оюутанд үзүүлэх үйлчилгээг сайжруулах. 1.7. Дэвшүүлсэн төсөл нь энэ журмын 1.2-т заасан зарчим баримтлахаас гадна судалгаанд суурилсан, бодит өөрчлөлт, үр дүнг харьцуулах боломжтой байна. Жэндерийн эрх тэгш байдлыг дэмжих нөлөөллийн 1 ажил төлөвлөж хэрэгжүүлнэ.
1.8. Төсөл хэрэгжүүлэгч нь дээд боловсролын сургалтын байгууллагын бакалаврын хөтөлбөрт хамрагдаж буй 3-аас доошгүй оюутнаас бүрдсэн баг байна. Багийн бүрэлдэхүүн нь жендэрийн эрх тэгш байдлыг хангасан байна. Төслийн багт хөгжлийн бэрхшээлтэй оюутан орсон байвал давуу тал болно. 1.9. Төслийн багийн гишүүд дараах шаардлагыг хангасан байна: 1.9.1. Тухайн дээд боловсролын сургалтын байгууллагын 1-3 дугаар дамжааны өдрийн ангийн оюутан байх; 1.9.2. 2015-2016 оны хичээлийн жилийн эхний улирлын дүнгийн тодорхойлолттой байх; 1.9.3. Нийгмийн идэвхтэй суралцагч байх ба үүнийгээ нотолсон байх. 1.10. Төсөл хэрэгжүүлэх нийт хугацаа 12 сараас хэтрэхгүй байна. 1.11. Төслийн хэрэгжих хугацаа дуусгавар болоход энэхүү журмын үйлчлэл мөн адил дуусгавар болно. Хоёр. Төсөл зарлах, хүлээн авах 2.1. Төсөл сонгон шалгаруулах тухай зарыг өдөр тутмын сонин, хэвлэл болон мэдээллийн бусад хэрэгслээр нийтэд 30 хоногийн хугацаатай зарлана. 2.2. Төслийн багт тавьсан шаардлагын дагуу төсөл боловсруулж, сонгон шалгаруулалтад оролцоно. Нэг баг нэг төсөл боловсруулж, дэвшүүлнэ. Хугацаа хоцорч ирүүлсэн төслийг хүлээн авахгүй. 2.3. Нэгдүгээр шатанд шалгарсан төслийг хоёрдугаар шатанд өрсөлдүүлэхээр шалгаруулснаас хойш ажлын 3 өдрийн дотор боловсролын асуудал эрхэлсэн төрийн захиргааны төв байгууллагад хүргүүлнэ. Гурав. Төсөл сонгон шалгаруулах, гэрээ байгуулах Нэгдүгээр шатны сонгон шалгаруулалт: 3.1. Нэгдүгээр шатны сонгон шалгаруулалтыг тухайн дээд боловсролын сургалтын байгууллага зохион байгуулна. 3.2. Нэгдүгээр шатны сонгон шалгаруулалтыг ажлын 5 өдөрт багтаан зохион байгуулна. 3.3. Оюутны баг дэвшүүлж буй төслөө сургуулиас томилогдсон шүүгчдэд танилцуулна. 3.4. Шүүгчдийн бүрэлдэхүүнийг 7 хүртэл хүний бүрэлдэхүүнтэй байгуулах бөгөөд шүүгчид нь тухайн дээд боловсролын сургалтын байгууллагын удирдах зөвлөл, эрдмийн зөвлөлийн тус тусын төлөөлөл, тэнхимийн эрхлэгч, оюутан болон бусад төлөөллөөс бүрдсэн байна. Шүүгчид энэ журмын 3.9-д заасан шалгуур үзүүлэлтийн дагуу сонгон шалгаруулалтыг явуулна.
3.5. Хоёрдугаар шатны сонгон шалгаруулалтад ирүүлэх төслийн тоо нь тухайн дээд боловсролын сургалтын байгууллагын оюутны тооноос хамаарна. Оюутны тоо болон харгалзах төслийн тоо нь дараах байдалтай байна: Оюутны тоо Дэвшүүлэх төслийн тоо 1-500 1 500-1000 2 1001-3000 3 3001-5000 5 5001-10000 7 10001-20000 9 20001-ээс дээш 11 3.6. Хоёрдугаар шатны сонгон шалгаруулалтад оролцох төслийг сургуулийн захиргааны албан бичиг, нэгдүгээр шатны сонгон шалгаруулалтад тэнцсэнийг нотолсон баримтын хамт боловсролын асуудал эрхэлсэн төрийн захиргааны төв байгууллагад ирүүлнэ. Хоёрдугаар шатны сонгон шалгаруулалт: 3.7. Нэгдүгээр шатны сонгон шалгаруулалтаас шалгарсан төслүүдийг олон талын төлөөлөл бүхий хорооны хуралдаанаар хэлэлцэж шалгаруулна. Төслийг үнэлж, дүгнэлт гарган шалгаруулах олон талын төлөөлөл бүхий хороог боловсролын асуудал эрхэлсэн Засгийн газрын гишүүний шийдвэрээр томилно. 3.8. Олон талын төлөөлөл бүхий хороо /цаашид хороо гэх/-нд боловсролын асуудал эрхэлсэн төрийн захиргааны төв байгууллага, Сургалтын төрийн сан, санхүүгийн асуудал эрхэлсэн төрийн захиргааны төв байгууллага, дээд боловсролын сургалтын байгууллага, аж ахуйн нэгж байгууллага, оюутны төлөөллийг оруулах бөгөөд тэд ашиг сонирхлын зөрчилгүй байна. 3.9. Төслийг дараах шалгуур үзүүлэлтээр үнэлнэ: Үндэслэл Шалгуур үзүүлэлт Хувийн жин % 1 Гарах үр дүн Төслийн үр дүн нь дээд боловсролын чанарын шинэчлэлийн зорилтыг хэрэгжүүлэхэд тодорхой хувь нэмэр оруулсан байх 25% 2 Хэрэгжих боломж 3 Төслийн багийн туршлага Зорилго, зорилт, үйл ажиллагааны төлөвлөгөө нь бодитой, хэрэгжих боломжтой байх Төслийн багийн гишүүд нь тухайн төслийг хэрэгжүүлэх итгэл үнэмшилтэй, санаачилгатай, манлайлах чадвартай байх 25% 15%
4 Төсөв Санхүүгийн төлөвлөгөө, төсөв нь үндэслэл сайтай, бодитой байх 5 Уялдаа холбоо Үйл ажиллагааны болон санхүүгийн төлөвлөгөө нь хоорондоо уялдаа холбоо сайтай байх 10% 10% 6 Тогтвортой байдал 7 Дэлгэрүүлэх боломж Төслийн үйл ажиллагаа цаашид төсөл дууссаны дараа хэвшил болж үргэлжлэх боломжтой байх Төслийн үр дүнг бусад байгууллагатай хуваалцах, түгээн дэлгэрүүлэх стратеги, төлөвлөгөөтэй байх 10% 5% 3.10. Хорооны нийт гишүүдийн онооны нийлбэрийн дундаж нь 90 хувиас багагүй төслийг хоёрдугаар шатны сонгон шалгаруулалталд шалгарсанд тооцно. 3.11. Хорооны үнэлгээнд дарга, гишүүд гарын үсэг зурж баталгаажуулна. 3.12. Хорооны сонгон шалгаруулалтын үнэлгээ, дүгнэлтийг боловсролын асуудал эрхэлсэн Засгийн газрын гишүүнд танилцуулж, дүгнэлтийг үндэслэн боловсролын асуудал эрхэлсэн Засгийн газрын гишүүн шийдвэр гаргана. 3.13. Сонгон шалгаруулалт дууссанаас хойш ажлын 3 өдөрт багтаан хорооны дүгнэлтийг төсөл ирүүлсэн сургуулиудад мэдэгдэнэ. 3.14. Шалгарсан төслийн гүйцэтгэгч, санхүүжүүлэгч талууд дүгнэлт хүргүүлсэнээс хойш 7 хоногт багтаан Төсөл хэрэгжүүлэх, санхүүжүүлэх тухай гэрээ байгуулж албажуулна. Дөрөв. Төслийн санхүүжүүлт 4.1.Төслийн цар хүрээ, гарах үр дүнгээс хамаарч төслийн санхүүжилтийн хэмжээ ялгаатай байна. Нэг төслийн санжүүжилтийн дээд хэмжээ 3.0 /гурван/ сая төгрөг байна. 4.2. Гэрээнд санхүүжилтийн хуваарийг тохирч тусгана. Төслийн санхүүжилтийг дараах байдлаар олгоно: 4.2.1. Төслийн нийт санхүүжилтийн 90 хувийг гэрээ байгуулсанаас өдрөөс хойш 14 хоногт багтаан олгоно. 4.2.1. Төслийн эцсийн тайланг хүлээлгэн өгснөөс 14 хоногийн дотор үлдэгдэл 10 хувийн санхүүжилтийг олгоно. Тав. Төслийн хэрэгжилтийн үр дүнг тайлагнах, хяналт тавих 5.1. Төслийн хэрэгжилтийн явцын /үйл ажиллагааны болон санхүүгийн/ тайланг төсөл хэрэгжүүлж эхэлсэнээс хойш 6 сарын дараа Дээд боловсролын шинэчлэлийн төслийн нэгж /цаашид Төслийн нэгж гэх/-д ирүүлнэ.
5.2. Төсөл хэрэгжүүлэгч төслийн үр дүнг нэгтгэн эцсийн тайланг боловсролын асуудал эрхэлсэн төрийн захиргааны төв байгууллага болон төслийн нэгжид заасан хугацаанд нь хүлээлгэн өгнө. 5.3. Төслийн тайланг боловсролын асуудал эрхэлсэн төрийн захиргааны төв байгууллага, төслийн удирдах хороо, төслийн нэгж хамтран хэлэлцэж үнэлгээ өгнө. Үнэлгээ өгөхөд төслийн үр дүн, сургуульд оруулсан хувь нэмэр, цаашид хэвшил болон үргэлжлэх боломжийг үнэлнэ. 5.4. Сургууль төслийн үр дүнг бүрэн эсвэл үе шаттайгаар үйл ажиллагаандаа нэвтрүүлсэн тухай тайланг төсөл дууссанаас хойш 6 сарын дараа боловсролын асуудал эрхэлсэн төрийн захиргааны төв байгууллага болон төслийн нэгжид тус тус ирүүлнэ. 5.5. Төсөл хэрэгжүүлэгчийн буруугаас төслийн явцын үнэлгээ хангалтгүй гарсан тохиолдолд зөрчлийг арилгуулах талаар сургуульд нь шаардлага хүргүүлэх ба зөрчлийг арилгасан талаарх тайлбарыг боловсролын асуудал эрхэлсэн төрийн захиргааны төв байгууллагад ирүүлнэ. Энэ хугацаан дахь зардлыг төсөл хэрэгжүүлэгч хариуцна. Зургаа. Төслийн үр дүнгийн шалгуур үзүүлэлт 6.1. Төслийн хүлээгдэж буй үр дүнгээс хамаарч шалгуур үзүүлэлт ялгаатай байна. 6.2. Тухайн төслийн үр дүнгийн шалгуур үзүүлэлтийг Төсөл хэрэгжүүлэх, санхүүжүүлэх гэрээнд тодорхой зааж өгнө. 6.3. Гэрээнд заасан шалгуур үзүүлэлтийг үндэслэн төслийн эцсийн үр дүнг үнэлнэ. 6.4. Боловсролын асуудал эрхэлсэн төрийн захиргааны төв байгууллага болон төслийн нэгж төсөл хэрэгжүүлэгчээс үр дүнг үнэлэхтэй холбоотой нэмэлт материал, нотолгоо гаргуулан авч болно. Долоо. Маргаан шийдвэрлэх 7.1. Маргаантай асуудлыг хэрхэн шийдвэрлэх зарчмыг гэрээнд тодорхой тусгана. ---о0о---